Hoteli i VIP-ave në Sarandë dhe emri i të shumëkërkuarit nga policia. Historia e çuditshme e pronës ku ndërtoi ‘Eskobari’

Emri i tij është i lidhur ngushtë me një hotel të njohur në Sarandë dhe me VIP-a që e frekuentonin.

Por historia e asaj prone mbi të cilën është ndërtuar hoteli, rezulton sa komike, aq edhe e trishtë.

Bëhet fjalë për ish-Kampin e Punëtorëve në Sarandë ku ndodhet hoteli i famshëm i frekuentuar edhe nga të njerëz të njohur të ekranit “Santa Quaranta”. Në opinionin publik ai njihet si hoteli i Klement Balilit, i ashtëquajtur “Eskobari i Ballkanit”. Por, pak njerëz e dinë që ajo në fakt është pronë sindikate.

HISTORIA

Si çdo kamp punëtorësh, në vitin 1992 kjo godinë i kaloi Bashkimit të Sindikatave të Pavarura. Më pas, në vitin 1997, me akt dhurimi, Gëzim Kalaja ia kalon këtë pronë një sindikate të vetme, Sindikatës së Ushqimit, Tregtisë dhe Bankave.

“Akti i dhurimit thotë shprehimisht: me aktin e dhurimit zhvishet nga e drejta e pronësisë BSPSH, dhe e vetmja pronare e ligjshme bëhet Sindikata e Pavarur e Ushqimit, Tregtisë dhe Bankave. Ky akt dhurimi është hiptotekuar në ZRPP Sarandë në datën 29/5/2000”, tha Maksim Mebelli, Sindikata e Ushqimit.

Por, sindikata shumë shpejt e gjeti veten të hedhur në gjyq nga familja Balili. Gjyqi përfundoi brenda një muaji dhe mori formën e prerë në favor të Bashkim Balilit, vëllait të Klement Balilit.

Por këtë proces gjyqësor, sindikata nuk ishte fare në dijeni.

“Bashkim Balili ka hapur një gjyq se gjoja ka marrë me qera nga BSPSH, ish kampin e punëtorëve në Sarandë. Në një kohë që BSPSH këtë pronë e ka dhuruar në 97”, tha Maksim Mebelli Sindikata e Ushqimit.

Ky konflikt pronësie nga viti 2000 e deri më sot ka shkuar plot 3 herë në të 4 shkallët e Gjyqësorit. Momentalisht pritet një vendim nga Gjykata e Larte si dhe nga Strasburgu.