“Më tërhoqën zvarrë në bodrumin e Bashkisë”, i riu rrëfen çfarë i bënë pasi i hodhi bojë Veliajt

Gjatë festimeve për Ditën e Verës këtë fundjavë, kreut të Bashkisë së Tiranës, Erion Veliaj i hodhën bojë dy të rinj. Një prej të ndaluarve rrëfen se e kanë dhunuar gjatë ndalimit.

Studenti, Gëzim Almeta është shprehur se pasi tentuan të njollosin me bojë Veliajn ai dhe shoku i tij, Nikolin Cali u shoqëruan me dhunë në bodrumin e bashkisë dhe aty për një kohë të gjatë u bënë viktimë e dhunës fizike dhe verbale, të ushtruar njëkohësisht nga disa persona.

“Jam sulmuar dhe më kanë rrahur brutalisht. Kanë qenë efektivë të RENEA, FNSH dhe Shqiponjave. Pasi më kanë rrahur më kanë tërhequr zvarrë në bodrumin e bashkisë  Tiranë. Më kanë dhunuar bashkë me një shok timin për 20 minuta.

Pastaj më shoqëruan në komisariat forcat “Shqiponja”, më goditën pas shpine me grushta. Në komisariat e konstatuan dhunën dhe nuk bënë asnjë reagim.

Nuk pranuan denoncimin tim. E drejta për të protestuar është në çdo vend demokratik. Protesta jonë vazhdon. Ky është një person që ka abuzuar prej vitesh  me kartat e studentit”, tha ai.