“Zgjohet” qeveria pas ditësh izolimi të Thethit, dërgohen dy borëpastruese për të zhbllokuar rrugën

Qeveria është kujtuar që pas javësh të tëra në izolim, t’i përgjigjet apelit të banoreve të Thethit. Ditën e martë drejt rrugës Qafë Thore – Theth janë dërguar dy mjete borëpastruese me qëllim që të nis zhbllokimi i këtij segmenti prej 16 kilometrash, në intervale të të cilit trashësia e borës shkon deri në 1 metër.

Rruga ndodhet nën pushtetin e dëborës që prej fillimit të dhjetorit 2020 dhe banorët i kaluan të izoluar festat e fundivitit dhe po ashtu pritën vitin e ri 2021 të bllokuar. As turistët që cdo vit i janë drejtuar Thethit, sivjet nuk mundën të shkojnë, e për pasojë dëmet që pësuan bujtinat ishin të mëdha, kjo pasi bllokimi i rrugës i la pa punë.

Disa herë përgjatë këtyre ditëve ato reaguan me forcë duke kërkuar marrje të masave nga strukturat shtetërore, por zëri i tyre kaloi në heshtje. Vetëm të martën ministria e mbrojtjes vendosi të dërgojë fadromat që të nis largimi i borës dhe të rihapet komunikimi për banorët e kësaj zone, që turizmin kanë të vetmen të ardhur. Reshjet e dendura të dëborës kanë ndërprerë edhe punimet në rrugën që i është nënshtruar rikonstruksionit, e ku sipas parashikimeve në pranverën e këtij viti duhet dorëzuar e përfunduar.

Por me këtë shtyrje që i ka bërë dëbora e rënë, afatet pritet që sërish të thyhen. Ajo që mbetet paradoksale në këtë ndërhyrje të qeverisë, është fakti se ajo bëhet pak muaj përpara zgjedhjeve, pas kërcënimeve që banorët i bënë se nuk do të lejonin të mbaheshin zgjedhjet e 25 prillit dhe se nuk do të jepnin votë për asnjë subjekt politik që në gjithë këtë kohë i ka nëpërkëmbur. Fatkeqësisht zgjedhjet vijojnë të përdoren fuqishëm në ndërhyrje publike, e ku kthetrave të votës nuk po i shpëtojnë as këtë herë edhe komuniteti i Thethit. /ShkodraNews